AARIN OLUBADAN AT'AWỌN ỌBA IBADAN DARU PATAPATA - IROYIN AWIKONKO

YAJO-YAJO

Saturday, February 8, 2020

AARIN OLUBADAN AT'AWỌN ỌBA IBADAN DARU PATAPATA

Aawọ to wa laaarin Olubadan ti ilẹ Ibadan, Ọba Saliu Adetunji at'awọn Ọba ilu Ibadan tun ti gba ọna mi in yọ.

Ọjọbọ tii ṣe ọjọ kẹfa oṣu keji ọdun yii ni Olubadan fi atẹjade kan sita, ninu eyi to ti sọ pe n ṣe loun ko ba le awọn Ọba mọkalelogun kuro nilẹ Ibadan, ti oun ba tẹle ohun ti ọpọ ọmọ ilẹ Ibadan n sọ.

Amọ ọkan lara awọn Ọba mọkalelogun, Lekan Balogun to ba BBC Yoruba sọrọ ṣalaye pe, isọkusọ gbaa ni Olubadan n sọ, ko si si ẹni to dan iru rẹ wo ri.

Ọba Balogun ni Olubadan ko lagbara bii ti wulẹ ko mọ, lati le awọn Ọba Ibadan kuro nilẹ Ibadan.

Balogun ni o ti le logoji ọdun ti oun ti wa lori oye niluu Ibadan, bẹẹ ni oun ko ti ri Olubadan to dan iru rẹ wo ri.


''Lati ọdun 1863 lawọn baba nla temi temi ti wa niluu Ibadan, wọn jọ tẹ Ibadan do ni, ẹba ọdan ni wọn n pe nigba naa, nitori naa ko si ẹni to le le mi kuro ni Ibadan,'' Oloye Balogun lo sọ bẹẹ.


O fikun ọrọ rẹ pe, awọn Ọba mọkalelogun gan an lo lagbara lati yọ Olubadan nipo, Olubadan ko lagbara lati yọ awọn Ọba ilu Ibadan.

Balogun sọ di mimọ pe, awọn eeyan kan ni wọn n ti Olubadan lati ṣe ọpọ ohun to n ṣe, kii ṣe wi pe Olubadan fun ra rẹ gan lo n daa ṣe awọn ohun to n ṣe.

O ni "danwo lo bi iya ọkẹrẹ, ti Olubadan ba sọ pe oun fẹ le awọn Ọba mọkalelogun, a jẹ wi pe o fẹ pin Ibadan si meji niyẹn, oun si lo maa jọba lori eyi to kere ju, ti ilẹ Ibadan ba fi pe meji.

Olubadan sọ ninu atẹjade to fi sita l'Ọjọbọ pe, awọn Ọba mọkalelogun yaju si itẹ oye Olubadan, ninu lẹta ti wọn kọ ranṣẹ si oun lọjọ kẹtadinlọgbọn oṣu kinni ọdun.

Ṣugbọn Oloye Lekan Balogun ni ko si ohun to buru kankan ninu iwe tawọn fi ṣọwọ si Olubadan, o ni awọn kan pe akiyesi rẹ si awọn nnkan kan to ṣe, ti ko dara ni.

Lati: BBC

No comments:

Post a Comment

PIN-IN KAAKIRI