ÀWỌN ÀṢÍRÍ ÌKỌ̀KỌ̀ T'ẸNIKẸNI KO TII GBỌ NÍPA IKÚ ỌKỌ OLÓYÚN - IROYIN AWIKONKO

LÉRÉFÈÉ


Friday, January 24, 2020

ÀWỌN ÀṢÍRÍ ÌKỌ̀KỌ̀ T'ẸNIKẸNI KO TII GBỌ NÍPA IKÚ ỌKỌ OLÓYÚN

Pẹlu bi ariwo iku gbajumọ ọkùnrin oloogun ìbílẹ̀ nni, Alaaji Abdul-Fatai Yusuf, ti gbogbo aye mọ si ỌKỌ OLÓYÚN ṣe n ja ran-in-ran-in n'ilẹ, ti ariwo ẹkùn iku rẹ si n lọ jakejado orílẹ̀-èdè yii, àwọn Ọlọpaa ti fi àṣírí bi wọn ṣe pa ọkùnrin naa at'awọn àṣírí ikọkọ to wa nidii rẹ s'ita l'oni-in.

Ninu atẹjade ti alukoro ileeṣẹ Ọlọpaa Ìpínlẹ̀ Ọ̀yọ́, Ọgbẹni Gbenga Fadeyi fi s'ita l'oni-in lo ti jẹ́ ko di mímọ pe, mọto meji ni Ọkọ Oloyun gbe rin ni ana to pade iku rẹ. O ni, àwọn Ọlọpaa meji ti wọn di ìhámọ́ra àt'àwọn eeyan mi-in ni wọn kọwọọ rin pẹ̀lú Ọkọ Oloyun.

Àwọn ẹṣọ aabo l'ọna marun-un ọ̀tọ̀ọ̀tọ̀ ni alukoro ileeṣẹ Ọlọpaa Ìpínlẹ̀ Ọ̀yọ́ ni Ọkọ Oloyun at'awọn ti wọn jọ rin irin-ajo l'anaa pade l'oju ọna, to si ni l'ẹyin eyi ni àwọn agbebọn ti wọn farapamọ s'inu igbo da ìbọn rẹpẹtẹ bo mọto Ọkọ Oloyun ni oju ọ̀nà Igbo-Ọra si Eruwa n'ipinlẹ Ọ̀yọ́.

Gbenga Fadeyi ni, niṣe ni ọ̀tá ìbọn ẹyọọkàn pere ba Ọkọ Oloyun, to si pa a ki wọn too gbe e de ileewosan. O ni, àwọn Ọlọpaa meji to tẹle Ọkọ Oloyun gbiyanju lati le àwọn oniṣẹ ibi to ṣíṣẹ yii mu, ṣùgbọ́n ti wọn raaye salọ.

O fi kun un pe, àṣírí nla kan to so pọ mọ ọ̀rọ̀ iku ojiji Ọkọ Oloyun ni bi ọkùnrin ọmọ bibi ilu Otu n'ipinlẹ Ọ̀yọ́ naa ṣe ri àwọn iwe kan ti wọn fi lu jibiti nla ni ọ́fíìsì rẹ to wa l'Ekoo, to si ni niṣe ni wọn dana sun àwọn iwe naa lati pa àṣírí to tu si Ọkọ Oloyun l'ọ́wọ́ mọ.

Fadeyi ni, Ejo l'ọ́wọ́ ninu nipa bi wọn ṣe dana sun àwọn iwe àṣírí to tu si Ọkọ Oloyun naa l'ọ́wọ́, to si lo ni nnkan ṣe pẹ̀lú iku rẹ. Nitori idi eyi, o l'awọn ti n f'ọrọ wa àwọn òṣìṣẹ́ Ọkọ Oloyun kan at'awọn Ọlọpaa meji to tẹ le e l'ẹnu wo ni eka to n ṣèwádìí ọ̀ràn ni Iyaganku niluu Ibadan lati mọ bi iku gbajumọ oníṣègùn ìbílẹ̀ naa ṣe jẹ́.

IMG_ORG_1579895441137 O kadii ọ̀rọ̀ rẹ n'ilẹ pe, Kọmiṣanna Ọlọpaa Ìpínlẹ̀ Ọ̀yọ́, Ọgbẹni Ṣínà Olukolu ti ṣèlérí pe, laipẹ yii l'awọn yoo tu ìṣù de isale ikoko iku Ọkọ Oloyun. Ìgbàgbọ́ wa pe, wọn yoo sinku Ọkọ Oloyun siluu rẹ, ìyẹn ilu Otu l'oni-in.

N'igba aye rẹ, gbajumọ oníṣègùn ìbílẹ̀ ni Ọkọ Oloyun. Oun ni Ààrẹ ẹgbẹ́ àwọn oníṣègùn ìbílẹ̀ l'órílẹ̀-èdè yii, ìyẹn Physiotherapists Association Of Nigeria (PAN), koda ọjọ́ Aiku, ìyẹn Sannde ọtunla yii ni baba naa fẹẹ lọọ ṣe ifilọlẹ ẹgbẹ́ PAN ẹ̀ka t'ipinlẹ Ondo.
 
Ọ̀pọ̀ eeyan lo ti ri iwosan lati ọwọ Ọkọ Oloyun l'ori ìṣòro wọn n'ipasẹ imọ ewe ati egbo to ni. Oun ni Aláṣẹ ati oludari ileeṣẹ D-Fayus International to n ṣe àwọn egboogi ìbílẹ̀ bii: Fijk Flusher, Pakurumo, Ko-Gbebe, Pan-Cola, iresi Megato Rice ati bẹẹ bẹẹ lọ.

Yàtọ̀ si eyi, alaaanu ọpọ eeyan ni Ọkọ Oloyun, bẹ́ẹ̀ lo tun jẹ opomulero ọpọ àwọn olorin esin Islam. Ọdọọdún lo maa n ṣ'eto waasi Ramadaani ni ileeṣẹ Ọkọ Oloyun to wa l'Ekoo nibi to ti maa n fun àwọn eeyan l'ounjẹ ọ̀fẹ́ ati oogun Fijk ọ̀fẹ́. Ọ̀pọ̀ àwọn gbajumọ Aafaa, paapaa Sheikh Muyideen Ajani Bello ni wọn sunmọ Ọkọ Oloyun pupọ.

Ọrẹ àwọn oṣere tiata at'awọn Olorin Fuji tun ni Ọkọ Oloyun, koda to fẹẹ ma si ọdún kan ki Alaaji Wasiu Alabi Pasuma tabi Alaaji Saheed Oṣupa ma ṣeré fun un. Yàtọ̀ si awọn eyi, ọrẹ àwọn sọrọsọrọ ori redio ati telifiṣan ni. Gbajumọ sọrọsọrọ nni, Oloye Timothy Agboọla t'ọpọ eeyan mọ si Ẹrẹkẹ Ni Shop lo sun mọ ọn ju ninu àwọn sọrọsọrọ. 

Iku nla ni iku Ọkọ Oloyun jẹ́ fun gbogbo ọmọ Yoruba, ṣùgbọ́n àwọn ibeere t'ọpọ eeyan ṣi n beere ni pe, o ṣe je Ọkọ Oloyun nikan ni ìbọn pa ninu àwọn ti wọn jọ rin irin-ajo?
 
Àwọn wo lo wa l'ẹyin àṣírí iwe jibiti to tu si Ọkọ Oloyun l'ọ́wọ́ ati bi wọn ṣe dana sun àwọn iwe naa?

Ẹ jẹ ka gbagbọ pe, àwọn Ọlọpaa yoo tu ìṣù de isale ikoko iku Ọkọ Oloyun gẹ́gẹ́ bi wọn ṣe ṣèlérí, ṣùgbọ́n ohun gbogbo to pamọ l'oju awa ẹ̀dá, kedere ni n'iwaju Oluwa.

No comments:

Post a Comment

PÍN-IN KÁÀKIRI