LOJO TI WON SO PE KI N WA FI ERAN S'ETUTU – ALAGBA AWOLUDE

Ogbontarigi ojise Olorun ti Olorun n gba owo sise ara, aami ati ise iyanu lorileede Naijiria, paapaa ninu soosi The Blessed New Jerusalem ni Alagba Samuel Awolude (JP). Awon ipa ti Alagba Awolude si ti ko ninu ise Oluwa ko se e fenu ka tan, awon to ba mon on lo mon. Odu si ni Alagba yi, kii sai mo f’oloko. Awon ipa to si ti ko lagboole igbagbo ti je ko gba opolopo awoodu lodo ijoba, nileese aladani ati laarin ilu, to fi mo awon egbe lorosirisi. Ojo Satide to n bo yi, iyen ojo kewaa osu yi ni soosi naa tun fe e fi oye tuntun da a l’ola, iyen oye His Emminece, Most Reverend Apostle. Alagba Awolude b’AWIKONKO soro lai pe nipa irin ajo aye, paapaa irin ajo e sidi ise Oluwa. Eyi lawon ohun ti iranse Olorun naa ba Olootu AWIKONKO, 'Segun Okeowo so.

AWIKONKO: E JE KA MO YIN LEKUNRERE?

AWOLUDE: Emi ni His Eminence, Most Rev. Apostle Samuel Oladele Olorunsogo Awolude, soosi The Blessed New Jerusalem Church of Christ Nigeria, to wa lopopona Kuto niluu Abeokuta. A bi mi lojo kokanla osu kejo odun 1952 si idile Emmanuel Sotayo Awolude ni abule Baase, nijoba ibile Owode, ipinle Ogun. Ileewe Zion African Church ni mo ti bere. Leyin ti mo pari ileewe mo lo sileewe onimo-ero (engineering) niluu Abeokuta. 1965 ni mo jade ileeko alakoobere, Leyin ti mo kuro nibe, mo lo kekoo nipa imo-ero niluu Abeokuta ti mo si kekoo gboye e lodun 1971. Igba ti mo kuro nibe ni mo loo sise nileese Marchant kan niluu Eko. Igba ti mo kuro nibe ni mo pada wa siluu Abeokuta ti mo fi wa a da ise temi sile, nibi ti mo ti n soowo moto. Mo tun lo si ileeko kan, igba ti mo de ni mo bere sii ra moto fawon eeyan, ti won n san owo e diedie. Enu ise naa ni mo wa ti mo fi feyawo mi, ti Olorun si jogun awon omo rere fun wa. Gbogbo awon omo mi ni Olorun bukun fun.

AWIKONKO: IGBA WO GAN AN LE EREE ISE OLUWA ATI PE BAWO LE SE BERE?

AWOLUDE: Ta a ba ni ka wo o, ojo ti won ti bi mi lodo Baba Oloruntedo Solomon nijoa ibile Owode ni asotele ti jade pe ise Oluwa ni ma a se. Mi o tete fokan sii, gbogbo bi mo se n lo kaakiri, ti mo tun da ileese mi sile ni Olorun n fara han mi pe ki n wa sise foun. O ti le laadota ti mo ti wa lodo Baba Peter ti won je Baba mi ninu Oluwa, ibe ni mo ti bere ise Oluwa lati Burooda, Diakoni, Pasito, Efanjeliisi, Refurendi, Apositeli, Apositeli Agba, titi ti mo fi di Apositeli Ololajulo Agba, iyen His Eminence, Most Senior Apostle.

AWIKONKO: LAARIN ASIKO TI WON N PE YIN FUN ISE OLUWA, NJE E TI E F’IGBA KAN SA SEYIN?

AWOLUDE: Beeni, mo sa seyin, mo ti e sa jinna nigba ti won n so fun mi pe mo maa sise f’Oluwa, ti Olorun fun’ra e tun n fi iran han mi, nitori ti mo wo o pe bawo ni maa se fi gbogbo nnkan ti mo ni sile loo sise Oluwa, tani yoo maa ba mi mojuto gbogbo nnkan ti mo ni. Emi to je pe won n ko owo wa fun, ti mo n ra moto, ti mo n tun un ta, nibo ni mo ti fe e rowo jeun, ti maa tun maa fi dawon eeyan l’ekoo, sugbon nigba to to asiko lodun 1972, ni Olorun sese wa a fi owo agbara e mu mi pelu aisan nla kan. Aisan yen lo tun gbe mi pada sodo Baba Peter Aladura, nitori pe mo ti na owo repete lori aisan naa, I mo se n lo si osibitu kan, ni mo tun n lo sibomin in, won ni ki n wa ra eran fi rubo, ki n setutu, mo si so fun won pe mi o le se e, idi ni yii ti mo fi lo sodo Baba Peter nibi ti Olorun ti gba ra emi mi pada. Igba to si je pe odo Jesu ni mo ti ri iwosan, lo je ki n kuku fi gbogbo aye mi fun Jesu Kristi. Odun 1999 ni mo gba ise Olorun tokan-tokan, mo si di iranse Olorun soosi Blessed New Jerusalem Church, to wa niluu Abeokuta.

AWIKONKO: GEGE BI ENI TO N ROWO TELE NIDI ISE TI E DA SILE, KO TOO DI PE E GBA ISE OLUWA. LAARIN IGBA TI E BERE ISE OLUWA, NJE E FIGBA KAN RI RO O PE E FEE FI SILE?

AWOLUDE: Mo ti ro o ri, nitori pe laarin igba ti mo n sise Oluwa yi ni mo loo sise nileese eto ikansira-eni to je tijoba apapo, ileese naa lo di NIPOST lonii. Igba kan wa ti isoro de, ti ko si owo mo, gbogbo igba yen, ko rorun rara nitori pe bi eeyan ba n sise Oluwa nigba min in, o tun nilo owo ninu, sugon pelu ifarada, mo fori tii, Olorun si gba ogo. Mo ro o laarin igba ti adojuko de pe mo fe e kuro nidi ise Oluwa, sugbon sibe, emi Olorun ran mi lowo. 

AWIKONKO: AWON IBO NI ISE OLORUN TI GBE E YIN DE?

AWOLUDE: Lati sise Oluwa ko rorun, laarin igba ti mo da ise sile, ti mo n ra moto fawon eeyan, temi naa tun n ta a, oju kan soso ni mo wa. Sugbon leyin igba ti mo gba ise Oluwa, awon ibi ti mi o lero pe mo le de ni mo ti lo lati ara ise iranse yi. Leyin ti mo di iranse Olorun ni mo lo si Israel, Jerusalem, Turkey, Palestine, USA atawon orileede min in.

AWIKONKO: IHA WO LAWON EBI YIN KO SI NIGBA TI E GBA ISE OLUWA, PAAPAA NIGBA TI NKAN KO FE E FI BE E JO ARA WON MO?

AWOLUDE: Gbogbo igba yen, kii se pe o le to ki n lo maa toro je, sugbon awon ebi mi farad a, paapaa iyawo mi, o fowosowopo pelu mi, o si gba ruku ti mi, o duro ti mi.

AWIKONKO: NJE E TI E LE SO DIE FUN WA NIPA ITAN SOOSI THE BLESSED NEW JERUSALEM ATI PE AWON IBO NI EKA SOOSI YI TI TAN DE?

AWOLUDE: E seun! Adugbo kan ti won n pe ni Oke-Itoku niluu Aeokuta lo ti bere lodo Baba Peter ti won je Baba mi ninu Oluwa ni nnkan bi 1970, ibe la ti kuro lo si Kuto ta a wa lonii. A ko si labe soosi kankan nitori pe se la da duro ta a si foruko sile lodo ijoba apapo. Ko si wahala kankan ninu soosi yi. Kaakiri orileede Naijiria la wa lonii. A ni eka kaakiri agbaye.

AWIKONKO: AYEYE IDANILOLA NKAN BO LOPIN OSE YI NINU SOOSI YIN, KI LE FE E SO NIPA E?

AWOLUDE: Mo ni lati dupe lowo Olorun fun ayeye naa nitori pe oore-ofe Olorun ni, kii se agbara mi tabi ogbon ori mi. Mo tun ni lati dupe lowo awon ti won duro ti mi paapaa awon igbimo agbaagba soosi yi fun ifowosowopo won pelu mi. Won fe e fi mi je Most Senior Apostle, . Igbimo agba kii deede fi ipo daayan l’ola, iwa ni won maa n wo, ebun eeeyan ninu agbara Emi Mimo, akitiyan ninu ise Oluwa. 

AWIKONKO: KINNI IYATO TO WA LAARIN ENI TO PE ARA E ATI ENI TI OLORUN PE?

AWOLUDE: Odara ki Olorun pe eeyan fun ise ju keeyan loun fi ara e sile fun ise Olorun lo. Bi Olorun ko ba pe eeyan, nnkan to ba wu eni na ni yoo maa se e. Ebi lo le opo awon de ibi ise Oluwa, nigba ti Olorun ma ape mi, mo ti nise mi lowo, ti mo tun da ileese mi sile, mo sa seyin, sugbon Olorun pada fi owo agbara e mu mi. Bi Olorun ba peeyan, o maa pese awon nnkan irorun fun un, awon nnkan to ma maa je, o si maa pese ona abayo pelu ibukun.

AWIKONKO: KINNI ORO YIN FAWON TO N BO SIBI AYEYE NAA?

AWOLUDE: Adura ni mo kan fe e gba fun won pe Olorun a pa alo ati aabo won mo. Kaakiri Naijiria to fi mo oke-okun lawon eeyan ti n bo wa a ye mi si. Gbogbo won ko nii kabamo.

AWIKONKO: AWOMRAN YIN FAWON TO FE E SISE OLORUN

AWOLUDE: Eni ti Olorun ba pe lo n yan, eni to a si yan lo n da l’ola, bi Olorun ba peeyan, ti Olorun ko pe maa n ni wahala to po. Looto a ni lati fi ara wa jin fun ise Olorun, sugbon ka duro de asiko ti yoo pe wa. Job 22:21 fidi e mule.

AWIKONKO: IDIBO ODUN 2019 TO N BO LONA, KI LORO AMORAN YIN FAWON OMO NAIJIRIA?

AWOLUDE: Mi o ni amoran pupo bi ko se pe ki onikaluku loo gba kaadi idibo alalope, iyen PVC won, ki won si dibo fun eni ti okan won ba yan. Eni ti Olorun ba si yan, ka fi adura ran an lowo lati se aseyori. Ebe ni mo n be pe kenikeni ma ta ibo rara, ki omo Naijiria ma se ta ibo e fun oloselu kankan, nitori pebi eni to ta ojo iwaju e ni.