WỌN NI AYEDERU ỌBA NI ALAKE ILẸ ẸGBA GBE ADE LE LORI, L'AWỌN ARAALU BA K’OGUN LỌ S’AAFIN - IROYIN AWIKONKO

WỌN NI AYEDERU ỌBA NI ALAKE ILẸ ẸGBA GBE ADE LE LORI, L'AWỌN ARAALU BA K’OGUN LỌ S’AAFIN

PIN-IN KAAKIRI
Bọsun Ọlaniyi, Abeokuta

Ara ko rokun, ara ko ni i ro adiyẹ ni wọn lawọn araalu Ọpẹlifa to wa ni Ọbada, Abẹokuta fọrọ naa ṣe lọjọ Fraide ọsẹ to kọja yi nigba ti wọn sọ pe Alake fẹẹ gbiyanju lati gbe ade le ọkunrin kan ti wọn pe ni Kaṣimawo Adisa Ogundele, ẹni ti wọn ni ki i ṣe ọmọ ilu naa lori.

Ohun ta a gbọ ni pe ọmọ bibi ilu Awori nijọba ibilẹ Ipokia ni wọn sọ pe awọna baba-nla Ogundele ti wa a ra ilẹ siluu Ọpẹlifa, ko too di pe wọn bẹrẹ si i pọ niluu naa, ṣugbọn tawọn ọmọ ilu naa fi ifẹ gba wọn mọra.

Nibi ti wọn sọ pe wọn fifẹ han naa de, lo mu ki wọn ṣagbatẹru Kaṣimawo Adisa Ogundele lati di kansẹlọ lasiko Gomina ijẹta, Ọtunba Gbenga Daniel, ti wọn si sọ pe ibi lo fi ṣu wọn lasiko naa.
Oloye Awopeju Saheed
AWIKONKO gbọ pe ni nnkan bi ọdun kan aabọ sẹyin ni wọn fi Oloye Awopeju Saheed Olumide jẹ Baalẹ ilu Ọpẹlifa, ti gbogbo ilu si fọwọ sii, ko da, ti wọn sọ pe Alake ilẹ Ẹgba, Ọba Gbadebọ lo gbe ọpa aṣẹ ati iwe ẹri fun ọkunrin naa nigba naa.

Ṣadede ni wọn sọ pe Gomina ana nipinlẹ Ogun, Sẹnetọ Ibikunle Amosun fawọn Ọba kan jẹ, ti wọn si l’ayederu ni pupọ ninu awọn Ọba yii, ati pe ẹmi imọ-oore ni Amosun fi han sawọn to fi jọba naa, eyi ti wọn ni Kaṣimawo Ogundele naa wa lara wọn.

A ti ẹ gbọ pe ọkan lara awọn oloye ẹgbẹ oṣelu APM ni Kaṣimawo Ogundele, ati pe iṣẹ takuntakun to ṣe lasiko idibo apapọ ati Gomina to kọja yi lo mu ki Gomina Amosun sọ ọ di ọba, ti wọn si fọwọ gba Baalẹ ilu naa sẹyin.

Ohun to n jẹ kayeefi ni ba a sẹ gbọ pe ori redio lawọn araalu ti gbo iroyin pe ọkunrin naa ti di ọba, nitori ti wọn sọ pe ko si afọbajẹ kankan, paapaa awọn araalu to mọ si.

Ọjọ Fraide to kọja yi ni wọn sọ pe Alake tilẹ Ẹgba, Ọba Adedọtun Arẹmu Gbadebọ fipade si pe ki gbogbo awọn ọba marundinlọgbọn ti Gomina ana yan wa a gba ade wọn, eyi ni wọn loo mu kawọn ọmọ bibi ilu naa gbe ifẹhonu han lọọ si Aafin Alake lati ma ṣe jẹ ki eto naa waye.

Nigba to n sọrọ pẹlu ibanujẹ ọkan, Oloye Awopeju Saheed Olumide to jẹ Baalẹ Ọpẹlifa so pe “Iyalẹnu lo jẹ pe Gomina ana, Ibikunle Amosun le da wahala nla silẹ ko too kuro nipo, tori pe oun lo fawọn kan ti wọn kii ṣe ọmọ ilu wa j’ọba le wa lori, ilu Awori lawọn baba-nla wọn ti wa gbe lọdọ wa, ko too di pe a ta ilẹ fun wa.

“Ẹhọnu la wa fi han pe wọn ko le gbe Alake le ẹni ti ki i ṣe ọmọ lu j’ọba le wa lori, tori pe Baalẹ wa niluu, ati pe gẹgẹ bi iwe ofin ṣe fi ye wa, Baalẹ ni wọn n sọ di ọba ilu. Lootọ, o ti jẹ kansẹlọ ri lasiko Ọtunba Gbenga Daniel, to si tun ṣiṣẹ fun ẹgbẹ oṣelu APM nini idibo to kọja yi.

“Ko sẹni to mọ igba ti Gomina muu gẹgẹ bi ọba, ori redio la ti n gbọ pe wọn fi jẹ ọba, ko si afọbajẹ kankan to gbọ nipa, to fi mọ awọn araalu, oku oru ni wọn fi ṣe, oniluu ko si ni i la oju ẹ sile, ko jẹ ko tu mọ oun lori.

“Olu-Ọbada mọ nnkan to n ṣẹlẹ tp si ti gba wa lamọnran, bẹẹ la tun ti fọrọ naa to Alake tilẹ Ẹgba leti, ṣugbọn ti wọn ko ti i gbe igbesẹ kankan nipa, iyalẹnu lo jẹ pe Alake ti gbe ade le ọkunrin naa lori. Ayederu ọba ni wọn fi jẹ. Mo si n fi asiko yi bẹ Gomina tuntun, Dapọ Abiọdun pe ko tete ba wa da si ọrọ yi, tori pe o ṣee ṣe kọrọ naa da ogun silẹ niluu wa.”

Olu tiluu Ọbada, Ọba Ọluwafẹmi Abiọdun Ṣolaja, Afẹjanlajiyan nigba to n b’Alariya Oodua sọrọ ni “Mo gbọ si nnkan to n ṣẹlẹ naa, ati pe Baalẹ wa niluu Ọpẹlifa to si jẹ ọmọ bibi ilu naa gangan, emi ni mo fi baalẹ naa jẹ, ti Alake ilẹ Ẹgba naa si fọwọ si i. Ko da, gbogbo Ilu Igbein naa fọwọ si i.

“Oṣelu ẹtanu loun to ṣẹlẹ yi, nnkan ti Gomina Amosun ṣe yi ko too lọ ku diẹ kaato nitori pe ọpọ awọn to lọ ba a ko sọ nnkan to n ṣẹlẹ lagbegbe yẹn fun un, toun naa ko si ṣewadii. Ọba kii pe meji laafin. Awa ko le yẹ Gomina Amosun lọwọ wo, tori pe oun gbogbo lo ni igba ati asiko.

“Asiko ti wọn n ṣe ti wọn, agbara wa lọwọ ni, eyi ti ko jẹ ka ṣe nkankan, ṣugbọn ni bayii ti wọn ti lo agbara wọn tan, mo nigbagbọ pe gbogbo wahala naa ni Gomina tuntun Dapọ Abiọdun yoo yanju.”

Gbogbo akitiya lati ba Oloye Layi Labọde (Baaroyin ilẹ Ẹgba), to jẹ agbẹnusọ fun Alake tilẹ Ẹgba sọrọ lo ja si pabo, nigba ti baba naa kọ jalẹ lati sọrọ lee lori. Bakan naa ni Kaṣhimawo ti wọn pe l’ayederu ọba yi sa fun AWIKONKO lati sọrọ titi dasiko ta a kọ iroyin yi tan.

No comments:

Post a Comment

PIN-IN KAAKIRI