KO SI NNKAN TO BURU NINU KA LO AWỌN NNKAN IJA ILẸ YORUBA LATI FI GBOGUN TI AWỌN ỌDARAN AJINIGBE - ỌLANREWAJU ADEDOYIN - IROYIN AWIKONKO

YAJO-YAJO

Sunday, July 14, 2019

KO SI NNKAN TO BURU NINU KA LO AWỌN NNKAN IJA ILẸ YORUBA LATI FI GBOGUN TI AWỌN ỌDARAN AJINIGBE - ỌLANREWAJU ADEDOYIN

Ọga agba ẹgbẹ eleto aabo ti fijilante, iyẹn Vigilante Group of Nigeria, nipinlẹ Ogun, Kọmanda Ọlanrewaju Nureni Adedoyin ti sọ pe ko si nnkan to buru ninu ka lo awọn nnkan ija ogun tilẹ Yoruba lati fi gbogun ti awọn ọdaran ti wọn sapamọ sawọn inu igbo kaakiri ilẹ Yoruba lati maa fi ṣiṣẹ ibi, iyẹn bawọn nnkan naa ko ba ti lodi sofin orilẹede Naijiria.
 
Kọmanda Adedoyin lo sọrọ naa lọsẹ to kọja yi nibi apejọ kan to ṣe nipa eto aabo, eyi to wa nile iṣẹ wọn to wa niluu Abẹokuta, ipinlẹ Ogun.

Nibẹ lo ti sọ pe ẹgbẹ VGN nikan lo mọ ọna abayọ si iṣoro to n koju orilẹede Naijiria nipa eto aabo nitori pe awọn sunmọ awọn araalu ju ile iṣẹ eleto to ku, nitori naa lo ṣe n rawọ ẹbẹ sijọba Aarẹ Buhari pe ki wọn tete bu ọwọ lu iwe abadofin ẹgbẹ wọn ko too pẹ ju.

Ninu ọrọ rẹ, o sọ pe “Ki i ṣe awọn Fulani darandaran ni wọn n sapamọ sinu igbo pa awọn eeyan, ti wọn n ji awọn eeyan gbe, bi ko ṣe awọn ajoji ti wọn yọ kẹlẹkẹlẹ wọ Naijiria wa. Awọn ajoji naa lo jẹ pe aṣọ Fulani ni wọn n gbe wọ, ṣugbọn wọn kii ṣe Fulani rara, bẹẹ ni wọn kii ṣe ọmọ orilẹede Naijiria.

“Inu igbo wa ni wọn si sapamọ si, ti wọn n fiya jẹ wa, paapaa nilẹ Yoruba. Ẹ maa ranti pe ilẹ Hausa ni wọn ti bẹrẹ, to si jẹ pe a ko tete fura, ko tooo di pe wọn de ilẹ Yoruba. A ko fẹ ki Naijiria to ti n jẹ anfaani ifẹ, iṣọkan ati eto aabo to peye lati ẹyin wa, wa a di eyi ti ko nii le sun asunpajude, eyi lo jẹ ka maa rawọ ẹbẹ sijọba Aarẹ Buhari pe ki wọn tete bu ọwọ lu iwe abadofin ẹgbẹ VGN ko too pẹ ju.

“VGN gẹgẹ bi ẹ ṣe mọ pe a mọ tinu-tẹdọ nipa eto aabo, awa la si le e mu gbogbo ipaniyan ati ijinigbe to n ṣẹlẹ nilẹ Yoruba, paapaa kaakiri orilẹede Naijiria wa si opin. Asiko naa ṣi wa bayii, ko too pẹ ju.

“Bi ẹ ba wo daadaa, ẹ maa ri i wipe wọn ko ba ti wọ inu ipinlẹ Ogun naa wa, bi ki i ba a ṣe igbiyanju wa pẹluu ifọwọsowọpọ awọn ọlọpaa la fi loo koju wọn, ki wọn too sa pada. 

“Loootọ, bi a ba wo o, awọn baba wa sọ pe aibọwọ f’agba ni ko jẹ ki aye gun. Awọn baba nla wa si ni awọn nnkan ti wọn fi n ṣeto aabo ko too di pe ọlaju wọle de, tawọn oloyinbo naa si gbe ti wọn de.

“Bi a le ri awọn nnkan eto aabo igba yẹn, ti wọn kii si i ṣe awọn nnkan to lodi sofin, ko si nnkan to buru nibẹ bi a ba fi daabo bo ara wa nilẹ Yoruba, ṣugbọn awọn nnkan igbalode yi naa lo yẹ ka lo lati fi jagun.

“Ki la fẹ ẹ fi wa awọn ọdaran ti wọn sa sinu igbo, bi ko ṣe ti ẹrọ-tuna-aṣiri, iyẹn drone to n fo loke, kinni yi lo si rin ju ohunkohun lọ, ti ko si si inu igbo ti ko le wọ lati tu aṣiri awọn ọdaran wọnyii."

Bakan naa lo wa fi kun ọrọ rẹ pe boun ba ṣi n wa ninu eto aabo lorilẹede yi, paapaa nipinlẹ Ogun, oun ko nii gba iwa ọdaran laaye bo ti wu ko mọ.

No comments:

Post a Comment

PIN-IN KAAKIRI